Vor de Dreien uss dr Klappe.
Gschwind e Kaffi, wills di friert,
Und e Cognac fir der Bappe !
Heggschti Zyt, s wird abmarschiert.
Ibernächtigt bisch und blaich...
Ändlig wider Morgestraich !

Stohsch im Gässli, äne dure
Gsehsch d Ladärne mächtig ko.
Naimen iebt e Waggis d Schnure.
Alles streggt der Hals derno,
Ob er au die Rächte braich.
Ändlig wider Morgestraich !

Und de heersch si pfyffe, drummle,
Dass s di bis in d Zeeche frait.
Jetz muesch druggen und di dummle.
Sunscht verfählsch die Heerligkait.
Griegsch au Biff und Tritt und Spaich,
Ändlig wider Morgestraich !

S brucht e freschtlig Morgeliftli,
Bis i ändlig haimzue stampf.
Us de Baize strycht e Diftli,
Larvelagg und Suppedampf...
S Härz isch gligglig, d Knei sin waich,
Ändlig wider Morgestraich !
 
 
 
 
 

Uss "e Basler Maie"
vom Blasius.
Uusegäh vo
Cliché Lang 1961.
 

zrugg zem Aafang